Svilup

Il dumber da dumondas e da pretensiuns particularmain areguard la transparenza, areguard la coordinaziun ed areguard la garanzia da qualitad en il sectur da la furmaziun supplementara è s'augmentà l'ultim temp ed ha manà a la fundaziun dal forum svizzer per la furmaziun supplementara e da la conferenza interchantunala per la furmaziun supplementara (CIFS).

Lescha federala davart la furmaziun professiunala

Pertutgant la basa giuridica ha la lescha federala davart la furmaziun professiunala (LFPr) meglierà la furmaziun supplementara orientada a la professiun. Tras la revisiun da las disposiziuns concernent la furmaziun è la furmaziun supplementara entrada en la constituziun federala (CF). La confederaziun fixescha ils princips davart la furmaziun supplementara.

eduQua

Cun eduQua è vegnì creà l'onn 2000 in label da qualitad che serva a garantir la qualitad sin il champ da la furmaziun supplementara. eduQua è in certificat da qualitad svizzer che certifitgescha las instituziuns da furmaziun supplementara sin fundament da differents criteris e da differentas pretensiuns minimalas. En pli e pli blers chantuns è il certificat dad eduQua la premissa per che instituziuns da furmaziun supplementara possian retrair daners publics.

CSCP

Dapi l'onn 2007 exista il center svizzer da servetschs per la furmaziun professiunala/cussegliaziun da professiun, da studi e da carriera (CSCP). Il CSCP è ina instituziun ch'è vegnida fundada da nov da la conferenza svizra da las directuras e dals directurs chantunals da l'educaziun publica (CDEP) e che presta servetschs en quels champs d'incumbensa ch'èn vegnids surdads als chantuns tras la lescha federala davart la furmaziun professiunala (LFPr). Sin il champ da la furmaziun supplementara surpiglia il CSCP tranter auter las suandantas incumbensas: producir meds d'infurmaziun per la cussegliaziun da professiun, da studi e da carriera e garantir la furmaziun supplementara da spezialistas e da spezialists en il champ da la cussegliaziun da professiun, da studi e da carriera sco er en la furmaziun professiunala ordaifer la scola.